جەماوەری بەڕێزی کوردستان!
لاوانە بەشەرەف و نیشتمان پەروەر!
ئەندامان، دۆستان، لایەنگران و ڕێبەرایەتی بنەماڵەی گەورەی دێموکرات!
سڵاوێک لە قووڵایی نیشتمانەوە، هەر لە دڵی رۆژهەڵاتەوە، لە نێ و نییەری دێموکرات پەروەر، لە هەورامانی جوامێرانەوە، لە سنەی خوێناوی، هەتا بۆریەروو سەقز و بانە و هەوشاری هەمیشە لە سەنگەر. سلاوێک لە بۆکانی حیماسە و مەهابادی لانکەی دێموکرات و ورمێ و سەردەشت و پیرانشاری بە هەیبەتەوە،لەشنۆی فەرماندە کەماڵەوە،سڵاوێک لە کرماشانی دێرین و سەحنەو هەرسین و ئیلامی هەمیشە مەکۆی کوردایەتی.
وێڕای پیرۆزبایی ڕۆژی ٢٥ی گەلاوێژ، ٧٥مین ساڵوەگەری دامەزراندنی حیزبی دێموکرات لە کۆمەڵانی خەڵکی کوردستان و ئەڤیندارانی ڕێبازی پڕسەروەری قازی، قاسملوو و شەرەفکەندی، بنەماڵەی سەربەرزی شەهیدان، زیندانیانی خۆڕاگری سیاسی، پێشمەرگەکان، ئەندامان و لایەنگرانی حیزبەکەمان، داوامان ئەویەکە سەرنج بدەن:
“ئێمە لاوانی رۆژهەڵات لە هەموو ناوچە جیا جیاکانەوە بەیەکگرتوویی و یەکدەنگی پەیامی هاودەنگی خۆمان ئاراستەی جەنابی لێپرسراوی گشتی بەڕێز مستەفای هیجری و جەنابی سکرتێری گشتی بەڕێز خالید عەزیزی دەکەین و دێینە دەنگ و دەڵێین کە ئێمە لاوانی روژهەڵات ساڵانێکە لە ژێر فشاری ڕێژیم‌داین و بە هەموو شێوازێک دەچەوسێینەوە و هیواکانمان بێ شۆق و خامۆش دەکەن.
ساڵانێکە کە یەک نەبوونی هێزی ڕەسەنی رۆژهەڵات، بە زەرەری خەڵک بووەو تەنیا مەیدانی بۆ هێزەکانی تر ئاوەڵا کردووە. لەم نێوانەدا ئێمە بووینەتە قوربانی دەستی پەرتەوازەیی و نایەکگرتوویی.
ڕەنگە ئەگەر ئێستا ڕێبەری مەزنی گەل د.قاسملوو مابا، بێ گومان چاوەکانی وەکوو گۆمی خوێنی سینگی شەهید گریانی لێ دەچۆڕا. ساڵانێکە ئێمەی لاو بەهای ئەو خەباتە دەدەین و ئامادەی گیانفیدایی زیاتریشین بۆیە ئێمە لەئێستادا لەو کاتە ئەستەمە دا وەکوو کۆمەڵێک لە لاوانی شۆڕشگێڕی ناوخۆی شارەکان و گوندەکانی ڕۆژهەڵات پێداگری دەکەین لە سەر هەرچی زووتر یەکگرتنەوەی حیزبی دێموکرات و دڵنیاین یەکڕیزی حیزبی دێموکرات دەبێتە هۆی بووژانەوەی هەستی خەباتکاری سەرجەم جەماوەری ڕوژهەڵات و ئەو یەک گرتنەوەیە دەبێتە هۆی گەیشتن بە قۆناغێکی نوێ لە خەبات و بەڕێوەچوونی سەمایەکی گەورە لە سەرتاسەری روژهەڵات”.
با دڵی خەڵکی خەباتکاری کوردستان و بنەماڵەی شەهیدان و زیندانیانی سیاسی و دڵسۆزانی دێموکرات بەیەکگرتنێکی پیرۆز شاد بکەین.
ئێمەی لاوان پێداگرانە داوای یەکگرتنەوە دەکەین چونکە حیزبی دێموکرات، ماڵە گەورەکەی هەموو خەڵکی روژهەڵاتە.
بە سپاسەوە
لاوانی شۆرشگێری روژهەڵات
۲۳ی گەلاوێژی ۱۳۹۹ی هەتاوی
۱۳ی ئاگۆستی ۲۰۲۰ی زایینی
