سەر لەبەیانی ڕۆژی سێ شەممە ٣٠ی بەفرانباری ١٣٩٩ی هەتاوی، شاندێکی یەکیەتیی لاوانی دێموکراتی ڕۆژهەڵاتی کوردستان بەسەرپەرەستی پێشەوا عەلی پوور سکرتێری گشتیی رێکخراو، سەردانی وەزارەتی ڕۆشنبیری و لاوانی حکومەتی هەرێمی کوردستانیان کرد و لەلایەن بەڕێز حەمەی حەمەسەعید وەزیری رۆشنبیری و لاوان و هەروەها بەڕێز نامیق هەورامی و دکتور جەمال حوسێن پێشوازییان لێکرا.
لەم دیدارەدا کێشە و ئاریشەکانی تایبەت بە لاوانی کورد و هەروەها لاوانی ڕۆژهەڵاتیی نیشتەجێی باشوور، بەتایبەتی باسکران و دۆزینەوەی مێکانیزمی کارا بۆ چالاکی لاوان لەبواری ڕۆشنبیری و وەرزشی، تەوەری سەرەکی باسەکان بوو.
لە کۆتایی دیدارەکەدا شاندی یەکیەتیی لاوان هەردوو پەڕتووکی “سوودەکانی شەڕ” لە وەرگێڕانی مامۆستا عەبدوڵڵا حەسەن زادە و هەروەها “کاریگەری بیری چەپ لەسەر بزاڤی سیاسی ڕۆژهەڵاتی کوردستان” لە نووسینی دوکتور ئیسماعیل بازیار-یان پێشکەش بە وەزیری ڕۆشنبیری کرد و لەلایەن وەزیری ڕۆشنبیری و لاوانیشەوە پەڕتوکی “دەستووری ژیان” پێشکەش بە شاندی یەکیەتیی لاوان کرا.
شایەنی باسە وەزارەتی ڕۆشنبیری و لاوانی حکومەتی هەرێمی کوردستان سەبارەت بە دۆسیەی تێکدانی کێلی هونەرمەند محەمەدی ماملێ و دۆسیەی دیکەی هەڕەشە لەسەر زمان و فەرهەنگ و هونەری کوردی لە ڕۆژهەڵات، خاوەن هەڵوێست بووە.
یەکیەتی لاوانی دێموكراتى رۆژهەڵاتی کوردستان
