سکرتێری گشتیی یەکیەتیی لاوانی دێموکراتی رۆژهەڵاتی کوردستان ئامادەبوانی خۆشەویست!
رێکخراوەکانی لاوانی هەرچواربەشی کوردستان!
بەخێر بێن بۆ یەکەمین دیبەتی لاوانی کوردستان ئێمە لە هەلومەرجێکدا لێرە کۆبوینەتەوە کە بەداخەوەی ئەو یەکیەتییەی لە نەتەوەکەمان چاوەڕوان دەکری وەدی نەهاتوە و لاوان دەبی پێشەنگی ئەو یەکیەتییە بن.
ئازیزان! خەباتی کورد لە هەموو پارچەکان هەڵگری کۆمەڵێک چەمکە وەک مافی مرۆڤ، دێموکراسی و پێکەوە ژیانی ئاشتیانە کە ئەگەر سەردەمێک زلهێزە جیهانی و ناوچەییەکان بەپێی بەرژەوەندی خۆیان واتایان بۆ ئەو چەمکانە دادەڕشت، هەنوکە لاوانی کوردن کە لە جیهانی بە ئۆرگانیزەکردنی چەمکەکاندا واتای راستەقینە دەدەن بەو پڕەنسیپانە. لاوان دەبێ ھەمیشە روانگەیەكی رەخنەیی بەڵام بەرپرسیارانەیان بەرامبەر دۆخی ھەنوكەیی ھەبێ، جا چ سیاسی چ كۆمەلایەتی و چ ئابووری. لاوان نابێ لەسیاسەتكردن سڵ بكەنەوە، بەڵام دەبێ نموونەیەكی نوێ و باشتر بن، دەبێ بە خوێندنەوە و ئاكاریانە نیشان بدەن كە قۆناغی رابردوویان دەربازكردووە، بە پاراستنی ئەوەی ھەیە و بەشێوەیەكی ئایدیالیستی لەداھاتوو بروانن، خەونی گەورە دەبێ پێناسەی لاوانی كوردستان بێ و ھەنگاوەكانمان دەبێ بۆ گەیشتن بە ئامانجە سەرەكییەكە بێ. واقیعبینی لەسیاسەتدا راستە، بەڵام ملكەچبوونی واقیعەتی سەپێندراوی داگیرکەر بۆ لاوان و نەوەی داھاتوو وەكوو ڤایرۆسێك وایە كە جووڵەت لێ دەبرێت و ناھێلێ كرداری گەورەت بۆ خەونی گەورە ھەبێ. كەواتا لاوان دەبێ بەھەموو شێوەیەك خۆیان پرچەك بكەن، بە زانست، ئیرادە و كردار و نیشتمانپەروەری. راستە واقیعی جیاواز و رەنگە میكانیزمی جیاواز لە ھەر چوارپارچەكەی كوردستان ھەبێ، بەڵام لەكۆتاییدا ھەموومان لە یەك كەشتیداین، ھەموومان یەك خەونمان ھەیە، یەك نیگەرانیمان هەیە و یەك ئاواتمیشان ھەیە کە ئەوەیش ئازادی و سەربەستییە. دەبێ بەر لەھەموو شتێك لەیەكتر تێبگەین، یەكترمان خۆش بوێ، شارەزایی مێژووی یەكتر بین و بتوانین بە زاراوەی یەكتر قسە بكەین و گوتارێكی ھاوبەشی ئایدیالیستیمان بۆ داھاتوو ھەبێ. خەباتی کورد ئێستاکە لە چڵەپۆپە دایە و ئەگەرسەردەمێک کێشەکانی رۆژهەڵاتی ناوەڕاست بە ئیسڕائیل و فەلەستین پێناسە دەکران ئەوە ئێستا قارەمانەتی پێشمەرگە و شەرڤان و گەریلا واتایەکی تری لەبەرەنگاری تێرۆر بۆ خەباتی کورد داڕشتووە کە بۆتە ناسنامەی کورد لە سەراسەری جیهان. ئەگەر سەد ساڵی رابردوو بخوێنینەوە بەتایبەتی ئەو 5 ساڵەی رابردوو موتالعە بکەین دەبینین کە ناسیۆنالیزم و نیشتمانپەروەری كلیلی چارەسەری كێشەكانە، نە عەرەب نە فارس و نە تورك و بگرە زلھێزە دێموكراتخوازو ناوەندەكانی مافی مرۆڤیش ھەتا كۆتایی لەپشت گەلێكی بێ دەوڵەت نابن، حەز دەكەن پێشمەرگەو شەڕڤانێكی باش بین بۆ ئەوەی تیرۆر نەھێلین، بەڵام نایانھەوێ پارێزەری وڵاتی خۆمان بین، لاوان دەبێ لەو راستییە تێبگەن كە شوناس و ھەنگاوی گرێدراو بە پاراستنی ئەو شوناسە زۆر چارەنووسسازە. لاوان لە رۆژهەڵاتی نێوەڕاست نابێ پاشکۆ بن. لە وڵاتانی رۆژئاوایی هەنوکە پاڕلەمان و وەزارەتخانە هەیە بۆ لاوان، لە سەردەمی کۆماری کوردستانیش ئەو قەزیە بە باشی و بە دیقەتەوە نەهادینە ببوو کە بەداخەوە ئێستاکە ئەو گرنگیەی کە پێویستە بەلاو نادرێت، هەنووکە پێویستە لاوان هووشیار بن و نەهێڵن دەستەمۆی بڕیاری سەپێندراو بن. ئیختلافی نەسلی بۆتە هۆکاری پەراوێزخرانی لاوان، بۆیە پێویستە لاوان ببنەوە چەقی ئاڵوگۆڕ و داینەمۆی گۆڕانکارییەکان و پێویستە نەسلی شۆڕشگێڕ بەمەیدان دان بەلاوان و نەسلی لاو بە رێزگرتن لەخەباتی شۆڕشگێڕان بتوانن دەستاودەستی خەبات و تێکۆشان بکەن بۆ بەجێگەیاندنی رەسالەتی مێژوویی بزوتنەوەی رزگاریخوازی کورد. لەکۆتاییدا با لەبیرمان نەچێ دوای رێفراندۆم گەلەکۆمەیەکی ئیقلیمی لە کورد کرا و کەرکوک و عەفرین داگیرکران و شارەکانی باکوور خاپور کران و قەڵای دیموکرات و سەرکردەکانی کرانە ئامانج. بێدەنگیمان شەرعیەتدانە بە هێرشی دووژمنان بۆسەرمان.
هەر بژین و سەرکەوتوو بن 13/12/2018