دوێنێ شەممە ڕێکەوتی ٢٤/٠٩/٢٠٢٢ بۆ پشتگیری لە ڕاپەڕینی سەرتاسەری خەڵکی ئێران و کوردستان بە تایبەتی بە دژی ڕژیمی ئاخوندی ئێران، سەدان کەس لە خەڵکانی دانیشتووی سوئێد کاتژمێر ١٧:٠٠ تا ١٩:٠٠ ی ئێوارە لە مەیدانی سێرگل تۆریەتی شاری ستۆکهۆڵم کۆبوونەوە.
لەو گردبوونەوە ناڕازەیاتیەدا بەشداربووان بە گووتنەوەی سروود و درووشمی شؤڕشگێری پشتیوانی خۆیان بۆ خەڵکی سەرشەقام و بەردەوام بوونی ناڕەزایەتیەکان لە ئێران بە دژی ڕژیمی دڕندەی تاران دەربڕی و داوایان لە وڵاتانی ئوروپایی و بە تایبەت سوئێد کرد کە کوشت و کوشتاری خەڵکی وەزاڵەهاتووی ئێران مەحکووم بکەن و چیدیکە دەستی دۆستایەتی و هاوکاری لەگەڵ ئێران تێکەڵ نەکەن.
لەو گربوونەوەیەدا زۆربەی پارت و ریکخراوە سوئێدی، کوردی و فارسیەکان بە خوێندنەوەی پەیام، پشتگیری خۆیان بۆ خوشک و برایانی خۆیان لەناوخۆی ئێران دووپات کردەوە.
لەو گردبوونەوە ناڕەزایەتیەدا ئەندامانی دڵسۆزی یەکێتی لاوانی دێموکڕاتی ڕۆژهەڵاتی کوردستان بەشداری دیار و بەرچاویان هەبوو و ئەوانیش وێڕای باقی بەشداربوون بە هەڵکردنی ئاڵای کوردستان، وێنەی ڕیبەرانی شەهید و هەروەها وێنەی ژینا ئەمینی پشتگیری خۆیان بۆ خەڵکی سەرشەقام لە کوردستان دەربڕی و درووشمی ڕووخانی ڕژیمی تارانیان بەرز کردوە.
یەکێتی لاوان بە ئەرکی خۆی دەزانێ کە سپاسی ئەندامانی بەشداربووی لاوان لەو گردبوونەوەیە دا بکا و لەهەمان کاتیشدا دەستخۆشی و ماندوونەبوونی خۆی بۆ سەرجەم بەشداربووانی ئەو مڕاسەمدا بنێرێ.
یەکێتی لاوانی دێموکڕاتی ڕۆژهەڵاتی کوردستان/ کۆمیتەی سوئێد
