میوانە ئازیزەکان!ِ
ئەندامان و لایەنگرانی یەکیەتی لاوانی دێموکراتی رۆژهەڵاتی کوردستان!
لاوانی شۆڕشگێر و نیشتمان پەروەری کوردستان!
بەشانازییەوە پێتان رادەگەیەنین کە کۆنگرەی حەوتەمی یەکیەتی لاوان لە کەشێکی ئازاد و دێموکراتیکدا و بە پەسەند کردنی کۆمەڵێک بڕیار و راسپاردەی نوێ بۆ قۆناغی نوێی خەبات و تێکۆشان، کۆتایی پێهات. حەوتەمین کۆنگرەی لاوان لە کاتێکدا بەڕێوە چوو کە گۆڕانکارییەکانی ناوچە و ئەم وڵاتانەی کوردستانیان بە سەردا دابەش بووە، رێکخراوەکەمانی زیاتر بۆ ئەم قۆناغە ئەرکدار کرد و لەم پێناوەش‌دا کۆمیتەی بەڕێوەبەری گشتی هەڵبژێردراوی کۆنگرەی حەوتەمی یەکیەتی لاوان هەوڵ دەدا گوتاری خەبات لە رۆژهەڵات زیاتر لە هەموو کات پڕاکتیزە بکات.
بەڕێزان!
لاوانی رۆژهەڵاتی كوردستان سەلماندوویانە كە میراتگرێكی بەوەفای پێشەوامان قازی محەمەد و كۆماری كوردستانن و ئێستاش لەهەموو جوڵەیەكی لاواندا نیشتمانپەروەری و خۆشەویستی بۆ خاك و خەڵكی كوردستان دەبینرێت. لاوانی رۆژهەڵات خاك و ژینگەی كوردستانیان خۆش دەوێت، هەربۆیە رێكخراوەی ژینگە پارێزی خۆڕسك پێكدەهێنن بۆ ئەوەی شاخ و دەشت و تەنانەت ئاژەلەكانی سەر خاكی كوردستانیش بپارێزن. لاوانی رۆژهەڵاتی كوردستان بەڵێنیان بەمێژوو و كۆماری كوردستان داوە، كە لەهەموو دۆخێكی داخراو و مەترسیداری ئێرانیشدا زمان و كلتوری وڵاتەكەیان بپارێزن، هەر بۆیەش ئەنجومەنە ئەدەبییەكانی رۆژهەڵات بەردەوامن لەپاراستنی زمان و كلتورو ئەدەبیاتی كوردستان. لاوانی نیشتمانەكەمان سنوورە دەستكردەكان كاریگەریان تێناكات و خەمی منداڵێكی شه‌نگالی دەیانگریێنێت و بزەی ئامەدییەك رووگەشیان دەكات. لەلایەكی دیكەش جیلێكی نوێی لاوانی رۆژهەڵات پێگه‌یشتوون كە پرسیار لەسەر رابردوو و ئێستا و داهاتووی نەتەوەكەیان و پێشڕەوانی بزاڤی رزگاری نەتەوەکه‌یان لە رۆژهەڵات دەكەن و بەوەڵامی كەمیش رازی نابن.
هەمووی ئەوانە وادەكات كە ئێمەی ئەندامانی یەكێتی لاوانی دێموكراتی رۆژهەڵاتی كوردستان ئەركمان قوورستر بێت و بە دڵناییەوە ئاسۆمان روونتر ده‌بێت. ئێمە هەوڵ دەدەین لەئاست ئەو ناسیۆنالیزمە مەدەنییەدا بین که لاوانی رۆژهەڵات لەتاریكترین ژینگەدا و لەبچووكترین دەرفەتدا ئاماژەكانی بۆ ئێمە دەنێرن.
هاوڕێیان!
لاوان وەک هێزی سەرەکی کۆمەڵگا و پێشڕەو لە گۆڕانکارییەکاندا، هەنووکە لە رۆژهەڵاتی کوردستان ئەرکیان لە جاران قورسترە و ئەگەر جاران لاوان تەنیا لە پرسە نەتەوەییەکاندا دەوری ئاوانگاردیان هەبوو، ئەوە ئێستا ئەرکیان قورسترە و دەبێ بەربەرەکانی لەگەڵ کۆمەڵێک دیاردەی قێزەونی وەکوو بانگەشەی گرووپە جیهادیە تەکفیرییەکان و بڵاوبوونەوەی مادە هۆشبەرەکان بکەن کە لە سایەی سیاسەتی دووژمن کارانەی کۆماری ئیسلامی هاتوونەتە ئاراوە.
بەڵام لەگەڵ ئەوەش دڵنیاین كە هەروەكوو چۆن لاوانی رۆژهەڵاتی كوردستان دوای ئەو گەلەكۆمەیەی که لەكۆمار كرا و پێشەوایان لەسێدارەدا، دوای ئەوەی رژێمی تاریكی لەقاڕنێ و قەڵاتان كۆمەڵكوژی دەستپێكرد و نیەتی سڕینەوەی كوردی لەرۆژهەڵات هێنا، دوای ئەوەی رێبەرانی دیموكراتی شەهید كرد و لەم ساڵانەشدا دوای ئەوەی سیستماتیك ماددەی هۆشبەری بەسەر كوردستاندا بڵاوكردەوە و دوای دەیان پیلانی دیكەش، لاوانی رۆژهەڵات چۆكیان دانەدا و ورەیان دانەبەزی و هەموو رۆژێك بیانوییەكیان بۆ خەبات دروستكرد، ئەمجارەشیان رێگە نادەن سەلەفییەتی تەكفیری و ماددەی هۆشبەرو بەسیستەمكردنی جاشایەتی فیكری و جەستەیی كاریگەریان تێبكات، ئێمه زۆر لەوە دڵنیاین كە لاوانی رۆژهه‌ڵات پێشەنگی خەباتێكی گەورەن، ئێمه هیچ شكمان نییە كە لاوانی رۆژهەڵات بەو جوڵانەیان خەریكە بەدەیان و بگرە سەدان جار ئامادەیی خۆیان بۆ هەموو ئەگەرێك نیشانی ئێمە دەدەن، دڵنیا بن پەیامەكەتان لای ئێمەیە، و ئەمڕۆ یان سبەی داوا ره‌واکانتان جێبه‌جێ ده‌که‌ین و لەكرماشان و سنەو مەهاباد یەكتر دەبینینەوە.
میوانە بەڕێزەکان!
یەکیەتی لاوانی دێموکراتی رۆژهەڵاتی کوردستان رەسالەتێکی مێژوویی هەیە و لە پێناو بەجێ گەیاندنی ئەم رەسالەتە مێژوویە، کۆمیتەی بەڕێوەبەری گشتی رێکخراوەکەمان دەست پێشخەر دەبێ لە وەسەر یەکخستنەوەی لاوانی دێموکرات و یەکگرتنی هەموو رێکخراوەکانی تایبەت بە لاوان لە رۆژهەڵات و هەوڵ دەدەین کە بە تێکشکاندنی ئاستەنگ و لەمپەرەکان، پردی پێوەندی لە نێوان لاوانی دێموکرات و سەرجەم رێکخراوەکانی تایبەت بە لاوان لە رۆژهەڵات پێک بێنین.
بەڕێزان!
یەکیەتی لاوان بە چاوی ئومێدە دەڕوانێتە خەباتی لاوان لە پارچەکانی تری کوردستان و بەرگری لاوانی رۆژئاوا له خاکی نیشتمان لە بەرامبەر گرووپە تەکفیریەکاندا بەرز دەنرخێنێ و هەروەها پشتگیری خۆی لە پڕۆسەی ئاشتی لە باکووری وڵات رادەگەیێنێ کە ئەمەش ئاکامی بەرخۆدانی بێ وچانی لاوان بوو کە دەبێتە هەوێنی ئاشتی. لە باشووری کوردستان نەتەوەکەمان چاوەنواڕی دوورە دیمەنی سەر بەخۆییە و لاوان بە هێزی لە بڕان نەهاتوویان لە بەرامبەر هێرشی تێرۆریستەکاندا لە سەنگەری بەرگری لە نیشتمان دان و ئەمە لە لایەن یەکیەتی لاوانی دێموکراتی رۆژهەڵاتی کوردستان بە بایەخەوە سەیردەکرێ و چاوەڕوانین ئەم هەلانەی کە لە پارچەکانی تری کوردستان پێک هاتووە ببێتە دەرفەت بۆ رۆژهەڵاتی کوردستان و لاوان لە پارچەکانی تر رێز لە خەبات و تێکۆشانی لاوان لە رۆژهەڵاتی کوردستان بگرن و پشتگیریان بکەن .
ئامادە بوانی بەڕێز!
لێره‌دا جێی خۆیه‌تی که‌ئه‌م وته‌ی دکتۆر سادقی شه‌ره‌فکه‌ندیتان بیر بێنینه‌وه که ده‌فه‌رموێ: “با لاوانی کورد، کوڕ و کچ باش بزانن کە ژیان لە ئەسیری و ژێردەستی دا چەندە بێقەدر و قیمەتە و لەبەرامبەردا،هەڵمژینی هەوای پاک و بێگەردی سەربەرزی و ئازادی چەندە خۆش و دڵڕفێنە”
سڵاو لە هەموو شەهیدانی کوردستان
سەرکەوێ خەباتی رزگاریخوازی میللەتی کورد
کۆمیتەی گشتیی بەڕێوەبەری
یەکیەتی لاوانی دێموکراتی رۆژهەڵاتی کوردستان
13/6/2714
