بە دەسپێشخەریی یەکیەتیی لاوانی دێموکراتی رۆژهەڵاتی کوردستان لە یەکێک سالۆنەکانی کۆمیسیۆنی ئامووزشی حیزب، سیمینارێک تایبەت بە تەندروستی تاک و رەفتارگەلی پێویست بۆ پێشگرتن لە تووشبوون بە نەخۆشییەکان بەڕێوەچوو.
پێشنیوەڕۆی رۆژی یەکشەممە ٢١ی گەلاوێژ دوکتور کۆچەر شێخانی سیمینارێکی لە ژێر ناوی هەڵسوکەوتی تاک بەرانبەر بە تەندروستی، بۆ بەشێک لە لاوان و کادر و پێشمەرگەکانی حیزبی دێموکراتی کوردستان بەڕێوەبرد.
ناوبراو باسەکەی لەچەند بڕگە پێشکەش بە بەشداربووان کرد.
سەرەتا کاریگەریی هەڵسوکەوتی تاکەکانی لە سەر تەندروستی خستەبەر باس و، بۆ ئەوەی مەبەستەکەی بپێکێت، پێناسەیەکی کورتی لەسەر تەندروستی بۆ ئامادەبووان شی کردەوە کە بریتی بوو لە ؛ حاڵەتێکی تەواوی “عەقڵی، جەستەیی، دەروونی و کۆمەڵایەتی” و، هەروەها بە شێوەی زانستی هۆکار و چەشنی نەخۆشییەکانی پۆلێنبەندی کرد.
د. کۆچەر شێخانی لە درێژەی سیمینارەکەیدا هەوڵی دا هەڵسوکەوتی تاک، لە بەرانبەر تەندروستی باس بکات و، لەو بارەوە کۆمەڵێک خاڵی گرینگی بۆ پێشگرتن لە نەخۆشییەکان خستەڕوو.
بەڕێزیان لەسەر هۆکارەکانی تێکچوونی تەندروستی و تووشبوون بە نەخۆشییەکان، بە باس کردن؛ لە دوو هۆکاری “نەگۆڕ و گۆڕاو” بە وردی چونیەتی هەڵسوکەوتی تاکەکانی لەو بارەوە بە گرینگ زانی و، چەند ڕێکارێکی بۆ پێشگرتن لە نەخۆشییەکان پیشنیار کرد.
ئەو سیمینارە زیاتر بۆ بردنە سەری زانیاریی لاوان پێکهاتبوو، بەڵام بەشێک لە کادرو پێشمەرگەکانی دیکەی حیزبیش تێدا بەشدارییان کرد و، دواتریش پرسیارەکانی خۆیانیان ئاراستەی کۆڕگێڕ د. شێخانی کرد و، بەڕێزیان وڵامی پرسیارەکانی دایەوە.
