کۆمیتەی پشدەری یەکیەتیی لاوانی دێموکڕاتی رۆژهەڵاتی کوردستان بەبۆنەی شەوی یەڵدا ڕێوڕەسمێکی لە شاری قەڵادزێ لە باشووری کوردستان بەڕێوەبرد لەو رێوڕەسمەدا کە شەوی دووشەممە ٣٠ی سەرماوەز بە بەشداریی دەیان کەس لە ئەندامانی یەکیەتیی لاوان و ئەندامانی حیزبی دێموکراتی کوردستانو کەسانی میوان بەڕێوەچوو، یادو بیرەوەریی لەدایکبوونی دوکتور قاسملوو بەرز ڕاگیرا.
ئەو ڕێوڕسمە بە سروودی نەتەوایەتی ئەی ڕەقیب و راگرتنی ساتێک بێدەنگی بۆ رێزگرتن لە گیانی شەهیدان دەستی پێکرد و پەیامی یەکیەتیی لاوان بەو بۆنەیە لەلایەن کارزان شەباهەنگ، جێگری سکرتێری گشتیی یەکیەتیی لاوانی دێموکڕاتی ڕۆژهەڵاتی کوردستانەوە خوێندرایەوەو لە بڕگەیەکی دیکەی ئەو ڕێوڕەسمەدا پەیامی کۆمیتەی قەڵادزێی حیزبی دێموکراتی کوردستان بەبۆنەی شەوی یەڵدا لەلایەن بێستوون ئازەرییەوە پێشکێش کرا.
لە درێژەی بەرنامەکانی ئەو کۆڕیادەدا حەسەن شێخانی، ئەندامی کۆمیتەی ناوندیی حیزبی دێموکڕاتی کوردستان لەبارەی کەسایەتیو ژیانو تێکۆشانی دکتور قاسملوو بۆ بەشداران دوا.
خوێندنەوەی پەیامو برووسکەی ڕێکخراوەکان، خوێندنەوەی شێعر لەلایەن فەرمان عەزیزو وەستا ڕەحمان خەیاتو تەکژەنیی دەف لەلایەن یۆسف کەڵەکاوێ چەند بڕگەیەکی دیکەی ئەو کۆڕیادە بوو.
لایەنە بەشداربووەکانی رێوڕەسمی شەوزستان:
بزوتنەوەی گۆڕان، مەکۆی قەزای پشدەر
پارتی دێموکراتی کوردستان، لیژنەی ناوچەی قەڵادزێ
حیزبی شیوعی کوردستان، کۆمیتەی قەزای پشدەر
یەکیەتی نیشتمانی کوردستان، کۆمیتەی رێکخستنی پشدەر
پارتی کرێکاران و رەنجدەران، ناوەندی رێکخستنی پشدەر
بەڕێوەبەرایەتی کتێبخانەی گشتی قەڵادزێ
لێپرسراوی کۆمیتەی ئامادەییەکانی قەڵادزێ
گرووپی نواندی ژانی گەل