رۆژی هەینی رێکەوتی 28/11/2014 یەکێتی لاوانی دێموکراتی رۆژهەڵاتی کوردستان دەورەیەکی یەک رۆژەی راگەیاندنی بۆ ئەندامەکانی و هەروەها بۆ لاوانی ئۆرگانە جیاجیاکانی حزبی دێموکراتی کوردستان رێکخست، لەو دەورەیەدا کە ماموستایانی زانکۆ ماموستا هەژار و فیروز مەیهەمی وانەکانیان دەوتەوە،
باس لە رۆلی راگەیاندنی سیاسیی و هاوکات شێوازی کاری ئەو راگەیاندنانە کرد کە لەقۆناغی خەباتی رەزگاری نەتەوەییدا خەریکی چالاکین. هاوکات لەلایەکی دیکەشەوە لە وانەیەکی دیکەدا ماموستای پسپۆری بواری هەواڵ و تیڤی شێوازی دروستکردنی هەواڵ و راپۆرتی رۆژنامەوانی بۆ ئامادەبووان شیکردەوە.
پانێلی یەکەم کە لەلایەن مامۆستا هەژار، مامۆستای زانکۆی سەلاحەدین پێشکەش کرا، تێیدا باسی لە رۆڵ و گرنگی راگەیاندنی سیاسی لەو قۆناغەدا بۆ رۆژهەڵاتی کوردستان کرد و هاوکات جەختیشی لەسەر ئەوە کردەوە کە کۆماری ئیسلامی ئێران لەرێگەی سەدان تیڤی و خەرجکردنی ملیۆنان دۆلار هەوڵی چەواشەکردنی خەڵی ئێران و رۆژهەڵات دەدات، هەربۆیەش بەرای ماموستا هەژار پێویستە راگەیاندکاری کورد لەگەڵ پێدانی زانیاری دەبێ رۆڵی هۆشیارکردنەوەشی هەبێت و بۆ هەموو پرۆپاگەندەکانی کۆماری ئیسلامی ئێران وەڵامی گونجاوی پێبێت. ئەو ماموستایەی زانکۆی سەڵاحەدین ئاماژەشی بەوەدا کە کارکردن لەبواری کەلتوور، موسیقا، هونەر و لەهەموویان گرنگتر مێژوو و سەرکردەکانی کوردی رۆژهەڵات بۆ نەوەی نوێ زۆر گرنگەو دەبێ هەموو ئەو تەوەرانە بەزمانێکی نوێ و بەقالبێکی نوێ بۆ خەڵکی رۆژهەڵات بڵاوبکرێنەوە، بۆ ئەوەی لاوانی رۆژهەڵات کە لاوی سەردەمن و تێکەڵی دونیان تێکنۆلۆژیا بوونە، بتوانن وەریبگرن.
هاوکات لە پانێلێکی دیکەی ئەو دەورە زانستییەدا ماموستا فەیروز مەیهەمی مامۆستای زانکۆ، باسی لە شێوازی وەرگرتنی زانیاری و توخمەکانی هەواڵ و راپۆرت بۆ ئامادەبووان کرد، بەرای ئەو مامۆستایە بۆ راگەیاندکارێکی رۆژهەڵاتی کوردستان پێویستە جەخت لەسەر چەمکە ئینسانی و جیهانییەکان بکاتەوە. ماموستا فیروز پێی وابوو میدیاکانی رۆژهەڵات دەبێ کاری جیدی لەسەر پرسەکانی مافی مرۆڤ و دێموکراسی و مافی ژنان و ژینگەپارێزی بکەن، چونکە هەموو ئەوانە رای گشتی دروستدەکەن. ئەو ماموستایەی زانکۆی سەلاحەدین ئاماژەی بەوەشکرد کە لەسەردەمی ئێستادا تەنیا خەباتی موومکین و پڕکاریگەری خەباتی راگەیاندنە، خەباتێک کە بەگوتەی ئەو دەتوانێ دەسەڵاتە سەرەڕۆکان بتۆقێنێت و بۆ ئەو بۆچوونەی چەندین نموونەی سەردەمیشی هێنایەوە.
جێگەی ئاماژەپێدانە کە یەکێتی لاوانی دێموکراتی رۆژهەڵاتی کوردستان لە درێژەی کاروچالاکییەکانی خۆیدا لەبەڕێوەبردنی دەورەی زانستی و کۆروکۆبوونەوەی پەیوەندیدار بە لاوانی رۆژهەڵاتی کوردستان بەردەوام دەبێت و بۆ ئەوە مەبەستەش نەخشە رێگەیەک ئامادە دەکات و لەداهاتوودا بۆ لاوانی رۆژهەڵاتی بڵاودەکاتەوە.
