پاشنیوەڕۆی رۆژی یەکشەمە ٢٢/١/٢٠١٧ یەکیەتیی لاوانی دێموکراتی رۆژهەڵاتی کوردستان لە رێوڕەسمێکدا لە شاری هەولێر بە ئامادەبوونی بەرپرسانی حیزبی و حکومی یادی کۆماری کوردستانی کردەوە.
رێوڕەسمەکە سەرەتا بە سرودی نەتەوایەتی ئەی رەقیب و ساتێک بە بیدەنگی وەستان بۆ گیانی پاکی شەهیدان دەستی پێکرد، پاشان بەڕێز نەوزاد هادی پاریزگاری هەولێر بە چەند وتەیەک سەبارەت بە کۆماری کوری کوردستان و کاریگەریەکانی لەسەر ئێستای کورد و نەوەی نوێ، رێوڕەسمەکەی کردەوە، پاشان پەیامی هاوبەشی یەکیەتیی لاوانی دێموکراتی کوردستان و یەکیەتیی لاوانی دێموکراتی رۆژهەڵاتی کوردستان لەلایەن پێشەوا عەلی پوور پێشکەش کرا، پێشەوا عەلی پوور لە قسەکانیدا وتی”دیاردەیەکی بەهێزی کۆماری کوردستان کە سەنەدیەتیدا بە مان و مەوجودیەتی نەتەوەی کورد ئەوە بوو کە قەرادادێکی نەتەوەیی هاتە گۆڕێ و هەنووکە ٧١ ساڵ دوای کۆماری کوردستان ئێستاش لەنێو هەموو چین و توێژەکانی نەتەوەکەمان لە هەرچوار بەشی کوردستان و لەهەموو مەیدانێکی سیاسی بۆنەتە شتێکی حاشا هەڵنەگر و رۆژ بە رۆژ زیاتر نەهادینە دەبن، ئاڵای کوردستان، مێژووی کوردستان، سروودی نەتەوایەتی ئەی رەقیب. لەهەموو دنیادا نەتەوەکان بە رابردوویان پێناسە دەکرین، رابردووی ئێمەش ئاڵای کوردستان و مێژووی خەبات و تێکۆشان و سرودی نەتەوایەتی ئەی رەقیبە. ”
هەر لە ئیدامەی وتەکانیدا پێشەوا عەلی پوور وتی: ” ئەمڕۆ لەسەردەمێکدا یادی کۆماری کوردستان دەکەینەوە کە بەشێک لە ئاواتەکانی قازی محەممەد جێبەجێ بووە، لە هەرێمی کوردستان، لەو شوێنەی کە سەردەمێک تێکۆشەرەکانی بە سەرپەرەستی مەرحوم بارزانی بوونە کۆڵەکەی سەرەکی کۆماری کوردستان، ئێستا بە خۆشیەوە ئێمە حکوومەتێکی کوردیمان هەیە بۆتە تەجروبەیەکی نوێی دێموکراسی لە ناوچەکەدا، هەر بۆیە ئەرکی هەموو هێزەکانە ئەم تەجروبەیە بپارێزین، تەجروبەیەکی دێموکراتیکە، دەسکەتێکی سیڤیلە و بەدوای دێموکراسیدا دەگەڕێ”
پاشان سرودێک لەلایەن کۆڕی هونەری یەکیەتیی لاوان پێشکەش کرا، بڕگەیەکی دیکەی رێوڕەسمەکە تەرخانکرابوو بە پێشکەشکردنی دێکۆمێنتاریەکی کورت سەبارەت بە کۆماری کوردستان کە ناوەندی راگەیاندنی یەکیەتیی لاوان ئامادەی کردبوو، بڕگەیەکی دیکەی ریوڕەسمەکە تەرخانکرانکرابوو بۆ رێزگرتن لە تێکۆشانی هەردوو هونەرمەند ئاسۆ مامزادە و شۆڕش ئاهی کە چەند پڕۆژەی میلیان سەبارەت بە پێشەوا قازی بەڕێوە بردوە. شاعیری نیشتمانپەروەر رەسووڵ سوڵتانیلە بڕگەیکدا شێعرێکی پێشکەش کرد.
لە کۆتاییدا بە سرودی ئافەرین قازی محەمەد ئافەرین، کۆتایی بە رێوڕەسمەکە هات.
