ناسر کەریمی ساڵی ١٣٧٨ لە شاری بانەی ڕۆژهەڵاتی کوردستان لەدایکبوو.
لە تەنیشت خوێندنی قوتابخانە حەزی بە کاری شانۆ دەکرد، بۆ ئەو مەبەستەش لە کتێبخانەی قوتابخانەکەیان بەردەوام پرۆڤەی شانۆی دەکرد و لە فێستیواڵەکاندا بەشداری دەکرد.
ناسر دەورانی خوێندنیدا کورتە فیلمێکی دروست کرد کە لە فێستیواڵی قوتابخانەکەیاندا پلەی دووهەمی بەدەست هێنا. ناسر هەر لە تەمەنی منداڵیەوە بە هۆی تێکؤشانی باوکی لە ڕێزەکانی ڕیکخستنی نەهێنی حیزبی دێموکرات، ئۆگری کوردایەتی بوو و لە کۆڕ و کۆبوونەوەکانی باوکیدا بەردەوام چەمک و دەستەواژەی نەتەوەیی و سیاسیی لە گوێیدا دەزرینگانەوە و ئەمەش ناسری پەلکێشی مەیدانێکی گەروەتر کرد.
ناسر تا پۆلی سێی ڕاهنومایی لە شاری بانەی ڕۆژهەڵاتی کوردستان دەرسی خوێندوە و دوای ئاشکرا بوونی خەباتی نەهێنی باوکی و فشاری دەزگا ئەمنییەکانی کۆماری ئیسلامی ، وێڕای بنەماڵەکەیان ساڵی ١٣٩١ی هەتاوی ناچار دەبێ زێدی خۆی بەجێ بهێڵێ و پەیوەستی ڕیزەکانی ئاشکرای حیزب دەبن.
هەر لەگەڵ هاتنیان بۆ نێو ڕیزەکانی حیزب، ناسر دەستی کرد بە فێربوونی زمانی کوردی و لە فێرگەی حیزب لەگەڵ پێشمەرگەکان دەرسی زمانی کوردی فێر بوو و پاشان لەگەڵ دەست پێکردنی وەرزی خوێندن لە قوتابخانەکانی باشووری کوردستان، خوێندنی لە قوتابخانە دەست پێکردەوە، لەگەڵ ئەوەیکە ناسر لە ئێران بە فارسی دەرسی خوێند بوو، بەڵام لە باشوریش یەکێک لە قوتابیە باشەکانی پۆلەکەی بوو. لەگەڵ ئەوەش لەناو قوتابخانە سیمای ناسر وەک تازەلاوێکی بەوەجی دێموکرات ناسرابوو.
یەکێک لە تایبەتمەندییەکانی ناسر ئەوە بوو کە کوڕێکی ڕوح سوک و کۆمەڵایەتی و خوێن‌شیرن بوو، هەر ئەو ببۆ هۆی ئەوی کە هەموو کات لە نێو کۆڕی هاوڕێیان و خەڵکدا جێگەی تایبەتی خۆی هەبێ.
لەناو ڕیزەکانی حیزبیشدا ناسر لە چالاکی هونەری و فەرهەنگی نەوەستایەوە و لەتەمەنی ١٤ ساڵی دا وەک لایەنگر پەیوەستی ڕیزەکانی یەکیەتیی لاوانی دێموکراتی ڕۆژهەڵاتی کوردستان بوو و پاشان لەتەمەنی ١٦ ساڵیدا وەک ئەندامێکی هەڵسوور و چالاک، تێکۆشانی خۆی لەو ڕێکخراوەدا درێژەدا. لە تەنیشت کاری یەکیەتیی لاوان، ناسر لە کوردکاناڵ دەوریەکی مۆنتێری دەبینی و بوو بە هاوکاری سەرەکی کورد کاناڵ.
وەک ئاماژەی پێکرا ناسر کەسێکی هەڵسووڕ و ماندوویی نەناس و ئەرک وەخۆگر بوو، ئەمەش وایکرد لە تەمەنی تازەلاویدا بدرەوشێتەوە و هەر لە تەمەنی ١٦ ساڵیدا لەلایەن یەکیەتیی لاوان بەشداری خولی پەروەردەی کادر دەبێت و لەوێش بە سەرکەوتوویی خوولەکە تێپەڕ دەکات و دەبیتە کادری یەکیەتیی لاوان.
ناسر تەمەنێکی کەم بەڵام پڕاوپڕ لە هیوا و ئارەزووی هەبوو، پێشمەرگایەتی یەکێک لە خولیاکانی ناسر بوو و بۆ ئەو مەبەستەش لە ڕیزی یەکیەتیی لاواندا وێرای بەشداری لە پەروەردەی سەرەتایی بۆ بەرگریی و خۆپاراستن، لە جەولەیەکدا وێڕای هاوڕێیانی دیکەی لە یەکیەتیی لاوان، شانبەشانی هێزی پێشمەرگە لە چیای هەڵگورد تێکۆشانی بەرچاوی هەبووە.
ناسرئەو کوڕە گەنجەی ئەوینی خاک هەڵیگرت، ئاواتی ئەوە بوو کە بە سەربەرزی بگەڕێتەوە بۆ ڕۆژهەڵات و لەوێ لە ناو هاووڵاتییان و هاوڕێیانی سەردەمی منداڵی خۆیدا ژیانێکی ئازاد بباتە سەر. مەخابن مۆمی ئاواتی ناسر لەلایەن شەمشەمە کوێرەکانی ڕێژیمی جەهل کووژایەوە و لە ڕێکەوتی ١٣٩۵/٩/٣٠ی هەتاوی، لە شەوئاهەنگی یەڵدا بەبۆنەی ساڵیادی لە دایک بوونی ڕێبەری گەورەی کورد دکتور قاسملووی نەمر، ناسر وێڕای ٤ تێکۆشەری دیکەی حیزبی دێموکرات و هەروەها ٢ کارمەندی ئاسایش، بوونە ئامانجی هێرشی کوێری سپای پاسداران و دەزگا ئەمنییەکانی کۆماری ئیسلامی و، لە ڕێگای دانانەوە و تەقاندنەوەی دوو بۆمب لەبەر دەرکی قەڵای دێموکرات، گیانیان لی ئەستێندرا و گیانی بەرزییان فیدای ڕێبازی پڕ لە سەروەری دێموکرات کرد.
